Om Nasjonalt senter for skriveopplæring og skriveforsking

Det overordna målet til Skrivesenteret er å styrkje skrivekompetansen hos barn, unge og vaksne. Senteret skal ha ein tverrfagleg karakter og arbeide med skriving som grunnleggjande ferdigheit i ulike fag og på ulike opplæringsnivå.

Bakgrunn

Skriving er ein nøkkelkompetanse i dagens kunnskapssamfunn:

• Skriving er ein av dei viktigaste lærings- og kunnskapsstrategiane våre
• Skriving er blitt eit stadig meir sentralt kommunikasjons- og lagringsverktøy
• Det blir stilt krav til skriveferdigheit i alle samanhengar i det moderne arbeidslivet

Kunnskapsløftet pålegg lærarar å arbeide med skriving som grunnleggjande ferdigheit i alle fag. Samstundes er skriving som fenomen i sterk endring (med nye medier, IKT, multimodale tekstar). Det er stort behov for meir kunnskap på feltet, og det er stort behov for å omsetje denne kunnskapen til god praksis.

Senteret har som hovudoppgåver å

• leie og koordinere arbeid med utvikling av arbeidsmåtar og vurderingsformer for å betre skriveopplæringa i alle fag og på ulike nivå i utdanningssystemet
• utvikle ny kunnskap om skriving
• spreie informasjon om forsking og utviklingsprosjekt knytt til skriving
• arbeide med å utvikle det nasjonale vurderingssystemet i skriving, til dømes ved å bidra til å utvikle utvalsprøvar i skriving
• støtte høgskolar og universitet i arbeidet med å utvikle kompetanse i skriving og skriveopplæring
• gi støtte til nasjonale og lokale utdanningsstyresmakter med råd og tenester om skriving og skriveopplæring 
• knyte kontakt med andre relevante fagmiljø, både nasjonalt og internasjonalt
• samarbeide med andre nasjonale senter om å utvikle skriving som grunnleggjande ferdigheit.

Arbeidet ved senteret skal vere forskingsbasert. Det inneber at vi må halde oss oppdaterte på andre si forsking og drive forskingsarbeid sjølve.

Arbeidsmåtar

Nettet vil bli ein svært viktig arena for det utoverretta arbeidet vårt. På www.skrivesenteret.no vil vi leggje ut informasjon om aktivitetar ved senteret, konferansar, aktuell litteratur, forskingsresultat m.m. Skrivesenteret arbeider også med å utvikle og samle gratis ressursar og støttemateriell for lærarar til bruk i skriveopplæringa. Vidare vil vi arrangere konferansar, etablere skriftserie, byggje opp regionale kompetansegrupper – for å nemne noko.

Vi håpar på nær kontakt med dykk som vi skal vere til for. Vi ser gjerne at de skriv eller ringer til oss med spørsmål, synspunkt og idéar.